3. Wänn hät de Jürg Gebuurtstaag?

  1. De Armin hät am achte Mai Gebuurtstaag.
  2. D Martina hät zwäiezwänzg Tääg nach em Armin Gebuurtstaag und vo de Sonja und de Caroline de gliich Abstand.
  3. D Sonja hät äi Wuche vorem Jürg Gebuurtstaag.
  4. D Caroline hät äin Monet und zwölf Tääg vor de Martina Gebuurtstaag.
  5. Acht plus zwäiezwänzg isch driisg.
  6. Also hät d Martina am driisgischte Mai Gebuurtstaag.
  7. D Sonja hät äin Monet und zwölf Tääg nach de Martina Gebuurtstaag.
  8. Also hät si am elfte Juli Gebuurtstaag.
  9. De Jürg hät äi Wuche nach de Sonja Gebuurtstaag.
  10. Elf plus sibe isch achzä.
  11. Also hät de Jürg am achzääte Juli Gebuurtstaag.

2. E grossi Ufregig

  • Mami, Mami!
  • Worum rüeft s Liseli eso verzwiiflet?
  • S tönt vo dusse vorem Huus! Ich gaa grad gschwind go luege! Hoffetli isch nüt Dumms passiert, usgrächnet hüt, wo de Ruedi Geburtstag hät!
  • Ales isch scho paraad, de Geburtstagschuechen und de Süessmoscht. In-ere Viertelstund chömed d Gescht. Aber mit öisem Liseli cha nüt wien-am Schnüerli laufe!
  • Mami, mami, ich bring de Chrueg nümen-ewegg! S Büsi hät de Chopf im Chrueg ine!
  • Oo, lueged emaal öise Schnurrli! Jez mues er mit-em Huet go Müüs fange!
  • Liseli, wie isch dänn das passiert?
  • Ich ha welle, das s Büsi au öppis hät vom Geburi! De Schnurrli hät doch so gern Nidel1Rahm und chunt fascht nie über! Ich han-echli2ein wenig i de chlii Milchchrueg too und han-en-em Schnurrli hergstellt zum Trinke. Uf äimaal isch er umegränt mit-em Chopf im Chrueg!
  • Ja, da müemer probiere, de Chrueg ewegg z nee. Du, Ruedi, heb emaal de Schnurrli ganz fescht, dass er nöd eso cha umezable3herum zappeln. Ich heb de Chrueg und probiere z zie! Ou, das gaat aber nöd guet! Wie hät dänn de Schnurrli sin Chopf chöne da ine stecke?
  • Was söllemer jez mache? Müemer de Chrueg verschlaa4verschlagen = zerbrechen?
  • Näi, ich ha s! Me müend de Chrueg treje, eso dass de Chatzechopf is Ovaal zwüschet-em Hänkel und em Usguss passt.
  • O ja, jez gaat s.
  • Zum Glück! Das wär jez no gsi, wänn de Schnurrli het müese mit-em Huet umelaufe! Und um de Chrueg wär s au schaad gsi!
  • Dörf i jez nöd am Geburifäscht debii sii?
  • Momoll, häsch s ja guet gmäint mit-em Büsi, mer cha nöd schimpfe mit dir. Aber s nächscht Maal muesch frööge, bevor öppis nimsch us de Chuchi.
  • Lueged emaal, wie de Schnurrli abhaut! Ich glaub, er wott siner Läptig5Lebtag kä Nidle me schläcke!
  • Los, s schälet6es klingelt. Si chömed!
  • Sind ir grad alli mitenand da? Das ischt guet!
  • Salü, Ruedi! Viel Glück zum Geburtstag! Das isch mini Fründin us de Stadt, d Nina. Mir wünsched dir alles Gueti zum Geburi.
  • Danke für d Iiladig!
  • Mini Schuelkolleege sind au scho da! Hoi zäme! Chömed ine.
  • D Nina und ich händ dir da es Geburi-Gschänk: mir händ mitenand Schoggi-Guetsli gmacht.
  • Danke vilmaal! Uf Schoggi-Guetsli fröi i mi gwaltig! Mer müend s grad hüt zaabig echli probiere.
  • Ich schänk dir mit-em Martin und em Toni zämen‑e CD [ˈtsedə] mit-eme klassische Konzert.
  • Das isch toll! Ir sind s Zäni!
  • De Ruedi loset imer no numen-eso altmodisches Züüg. Hüt loset mer doch ganz anderi Sache! Mir gfallt d moderne Mussig vil besser!
  • Du chunsch aber vil Gschänk über! De grüe Pulli vo de Grossmueter find ich au eso schöön! Und lueg, jez chunt sogar no s Liseli mit-eme Gschänk.
  • Lueg da, Ruedi, Blüemli für dich!
  • Wau, en ganze Struuss! Und was für en schööne! Gääli, blaui, wiissi, roti Blueme! Woher häsch du dänn son-en schöne Bluemestruuss?
  • Dänk us-em Gaarte vo de Mueter gholt. Liseli, bisch e fertigs Luusmäitli!
  • Chömed, jez wämer mini Geburtstagsturten ässe. D Mueter hät äxtra ganz e groossi gmacht!
  • Du, Ruedi, zu dim Geburi lad ich dich ii, emaal mit mir z Züri go bumle und echli d Stadt aaluege.
  • Das isch e guete Idee, da chum i gern!

1. Neui Lüüt chenne leere

• Wie isch Ire Name?
◦ Min Namen isch Iten.
• Wie isch din Name?
◦ Min Namen isch Ueli.
• Wie heissed Si?
◦ Ich heissen Iten.
• Wie heissisch du?
◦ Ich heisse Ueli.
• Sind Si de Herr Odermatt?
◦ Ja, ich bi de Herr Odermatt.
• Bisch du de Bruno?
◦ Ja, ich bi de Bruno.
• Sind Si d Frau Hefti?
◦ Nei, ich bi nöd d Frau Hefti.
• Bisch du d Anna?
◦ Nei, bini nöd.
• Wo woned Si?
◦ Ich wone z Züri.
• Wo wonsch (du)?
◦ Ich wone z Bärn.
• Wie isch Iri / dini Adrässe?
◦ Mini Adrässen isch Dorfstraass 5.
• A welere Strass wonsch?
◦ Ich wonen a de Dorfstraass.
• Woher chömed Si?
◦ Ich chume vo der Schwiiz.
• Woher chunsch (du)?
◦ Ich chumen us de Schwiiz
• Was isch Iri Mueterspraach?
◦ Mini Mueterspraach isch Schwiizertüütsch.
• Was isch dini Mueterspraach?
◦ Ich rede Schwiizertüütsch.
• Wie lang sind Si i de Schwiiz gsi?
◦ Ich bin sit 6 Jaar i de Schwiiz gsi.
• In welem Land läbsch (du)?
◦ Ich läbe i de Schwiiz.
• Was isch Ire Brueff?
◦ Min Brueff isch Metzger.
• Was bisch (du) vo Brueff?
◦ Ich bi Studänt (vo Brueff).
• Wie gönd Si go schaffe?
◦ Ich gaa / faar mitem Auto / Töff / Velo.
• Wie gaasch (du) go schaffe?
◦ Ich gaa / faar mitem Zug / Tram / Bus.
• Wie lang bruuched Si für de Aarbetswäg?
◦ Ich bruuche 30 Minuute für de Aarbetswäg.
• Gfalt dir d Aarbet?
◦ Nei, d Aarbet gfalt mer nöd.