4. Mit de Tote fiire

Allerheilige isch es katholischi Gdänktag, wo weltwiit bchannt isch. Es isch sogar en gsetzlichi Fiirtag in vielne Kantön vo d Schwiiz. Was villi nöd wüsset, isch, dass Heilige nöd die mäint, wo heiliggsproche worde sind, sondern die Seele der Chinder, wo gstorbe sind, bevor si Ziit gha händ zum Sündige. Und dass s früerne es drüütägigs Fäscht gsi isch, wo am 31. Oktober aagfange hät. De letschte Tag vo dene Fiirlichkeite, de 2. Novämber, isch de Tag vo allne tote Gläubige.

In Ecuador, woni gbore bin, isch de 2. Novämber en gsetzlichi Fiirtag. A dem Tag werde Brotchinder gbacke, wo fascht wiene Zürcher Grittibänz usgseend, und Guaguas de Pan heissed (Guagua isch es Kichwa-Wort für «Chind»). Und s wird Colada Morada gbraut, es süesse, heisse Gtränk us rote Früecht, ähnlich wie d dütschi roti Grütze.

D Familie, wo tote Aaghörige händ, gönd i de Friidhoof si go bsueche, und bringe d Brotchinder und es Gtränk mit, und si länd die Sache am Grab als Gschänk für d tote Aaghörige. D Familie, wo käi tote Aaghörige zum Bsueche händ, bliibe dihei und ässet d Brotchinder und es Gtränk sälbscht. Familien us de indigene Bevölkerig bringet au anderi Sache mit i de Friidhof, und si fiiret es Fäschtässe am Grab vo irne Aaghörige, sogar mit Musig und Schnaps.